إن هويتونا هويناكم
وبنتصبّر لي جفيتونا
ما عرفنا الياس ويّاكم
وين بتسيرون تلقونا
مستحيل إن كان ننساكم
لو تقصّدتوا تهجرونا
نهجر الدّنيا بليّاكم
دونكم عمري فلا ايكونا
نرخص الغالي إلعيناكم
وكل صعب إلكم يهونا
في الصّحا والنوم ننصاكم
لا تسدّوا الدّرب من دونا
وفي الحشا والقلب سكناكم
امشيّدات اقصور وحصونا
نور ياضي من محيّاكم
مثل نور الصبح في الكونا
إنفردتوا في سجاياكم
نادرين الحسن واللّونا
لو حسبناها مزاياكم
يوصل التّعداد مليونا
شاف شرع الحب دعواكم
والهوى له شرع مضمونا
عادل لو كان يدراكم
يا الغضي لي دوم مزبونا
وان طلبتونا عطيناكم
وبا انزيّد إلكم أوزونا
لو أخذتوا الزود يفداكم
حبّنا متوازن اركونا
